Bob freed 9 maaie waard der wer in Bobjûn organiseare foar frijwilligers, Boppers en opperBoppers(stipers) fan it Greidhoek’ Festival. Op dizze noflike jûn yn it appelhôf oan de Van Sminialeane waard der alderaardichste muzyk spile troch Ancient Remedy en wie der wer in wiere parsekonferinsje foar it Greidhoek’ Festival 2014. It festival sil dit jier barre op sneon 13 septimber op it swimbadterrein yn Wommels. Op ludike wize waard bekend makke hoe ’t dy dei der sa ’n bytsje útsjen sil. Bob Ate en Bob Willem fertelden oer de tagongspriis(€10,-), it stypjen fan it festival (€40,- of €100,-) en wat je dêrfoar allegear werom krije(kaartsjes fansels, mar ek ivige rom en respekt), en dat der ein augustus wer in spesjale festivalkrante by de Op ‘e Skille sit. Jumbo Kooistra waard presenteare as nije haadstiper fan it Greidhoek’ festival.

It festivaltema sil dit jier wêze; “op haren en snaren”. Jim sille dit wer op ferskeidene manieren nei foaren sjen komme troch fansels it hier fan Bob, mar ek de snaren fan de ferskeidene kontrabassen, fioelen en gitaren fan de bands dy ’t der spylje.
It Greidhoek’ Festival begjint middeis wer om in oer as 17.00 op de Terp. Ferfolgens sil dit oergean nei it festival op it swimbadterrein. Op it festival is ek dit jier wer in ferskaat oan û.o. keunst(û.o. De Zoete Hanen en Wolwêzen), muzyk en poezy te finen. Neist de folk fan Fryske trots DIFF , de stonerrock fan Del Toros, de ekspirimentele rock fan Stuurbaard Bakkebaard, de klezmer fan Klavan Gadjé en de glamrock fan KISS on the Rocks sil Nico Dijkshoorn in DJ-set dwaan mei de Tale Kanaäns. Ek 3voor12-Friesland komt noch mei inkele bands. As ôfslúter fan it festival sil dé psychobillyband fan Nederlân Batmobile spyle.
It festivalterrein sil ek dit kear wer eigenwiis en smuk oanklaaid wêze en der kin wer noflik iten en dronken wurde. Nei de parsekonferinsje koe eltsenien fierder genietsje fan in hapke en in snapke en it útsjoch oer it appelhôf, noch efkes dûnsje op de muzyk fan Ancient Remedy en alfêst útsjen nei Greidhoek’Festival 2014.

Sjoch ek hjir foar it “programma fan 2014” oan ’t no ta.

Bob seit: “De Bobs wienen ek Bob de Bobjûn!”